Соли 2022 ба Тоҷикистон нисбат ба соли 2021 1,9 баробар зиёд сармояи мустақими хориҷӣ ворид карда шудааст. Дар робита ба ин Кумитаи давлатии сармоягузорӣ ва идораи амволи давлатии Ҷумҳурии Тоҷикистон аз имзо гардидани беш аз сад санади ҳамкорӣ дар соли гузашта ба маблағи умумии 32 миллиард сомонӣ иттилоъ медиҳад.
Раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон Саъдӣ Қодирзода имрӯз дар нишасти матбуотӣ ба намояндагони воситаҳои ахбори оммаи ватанӣ ва хориҷӣ гуфт, ки санадҳои ҳамкорӣ дар доираи баргузории форуму ҳамоишҳои соҳибкорию сармоягузорӣ, ки бо доираҳои сармоягузорию тиҷоратии давлатҳои хориҷӣ, назири Миср, Белгия, Чин, Туркия, Узбекистон, Корея, Русия, Беларус, Амрико, Арабистони Саудӣ ва форумҳои минтақавӣ дар вилоятҳои Суғд, Бадахшон, Хатлон баргузор карда шуданд, ба мувофиқа расонида шуданд.
Бо дахли сармоягузории давлатӣ Саъдӣ Қодирзода афзуд, ки дар ин давра 72 лоиҳаи сармоягузории давлатӣ ба маблағи умумии 40,0 миллиард сомонӣ амалӣ гардида, азхудкунии маблағҳо 5,3 млрд сомониро ташкил медиҳад.
Гуфта шуд, ки барои татбиқи лоиҳаҳои сармоягузории давлатии афзалиятнок дар соҳаҳои калидии иқтисодиёти мамлакат бо шарикони рушд созишномаҳои нав ба маблағи беш аз 7 миллиард сомонӣ муодили 717,2 миллион доллар ба имзо расонида шуданд, ки 93 фоизи онро маблағҳои грантӣ ташкил медиҳанд.