Дастаи мунтахаби ҷавонони то 20-солаи Тоҷикистон оид ба футбол таҳти роҳбарии мутахассиси беларусӣ Олег Кубарев ба бозиҳои марҳилаи ниҳоии Ҷоми Осиё-2023, ки аз 1 то 18 март дар Ҷумҳурии Узбекистон доир мешавад, омодагӣ мебинад.
Ҷамъомади дуюми таълимӣ-тамринии дастаи мунтахаби ҷавонони Тоҷикистон, ки дар он 27 бозингар – 3 дарвозабон, 9 дифоъгар, 9 нимҳимоягар ва 6 ҳамлагар шомиланд, то 19 январ дар шаҳри Душанбе идома меёбад.
Даста тибқи реҷа ду маротибагӣ тамрин карда истодааст. Дар вақтҳои нисфирӯзӣ дастаи мунтахаби ҷавонони Тоҷикистон тамринҳояшро дар толори болопӯшидаи Академияи «Ювентус» дар шаҳри Душанбе гузаронида, бегоҳирӯзӣ тамринҳо дар маркази варзишии «Тоҷварз» гузаронида мешаванд. Рӯзи тамринӣ бо давидан дар майдони варзишгоҳи марказии шаҳри Душанбе анҷом меёбад.
Қобили зикр аст, ки дар бозиҳои марҳилаи ниҳоии Ҷоми Осиё-2023 миёни дастаҳои мунтахаби ҷавонони то 20-сола, ки аз 1 то 18 марти соли 2023 дар Ҷумҳурии Узбекистон баргузор мешаванд, дастаи мунтахаби ҷавонони Тоҷикистон шомили гурӯҳи «С» буда, бо дастаҳои мунтахаби ҷавонони Урдун (2 март), Уммон (5 март) ва Кореяи Ҷанубӣ (8 март) рақобат мекунад.
Тибқи натиҷагирии Ҷоми Осиё-2023 дар Узбекистон чор дастаи беҳтарин соҳиби роҳхати мустақим ба чемпионати ҷаҳон-2023 дар Индонезия мешаванд.