Темур Раҳимов аввалин медали тиллоро дар таърихи дюздои Тоҷикистон дар мусобиқаҳои Grand Slam соҳиб шуд.
Дар мусобиқоти «Baku Grand Slam 2022», ки аз 4 то 6 ноябр дар Озарбойҷон баргузор гардид, варзишгари маъруфи тоҷик — Темур Раҳимов дар даври ниҳоӣ дар рӯзи охири мусобиқа дар вазни +100 кг тавонист дар қуввасанҷӣ бо намояндаи Узбекистон Алишер Юсупов бо имтиёзи иппон пирӯз шавад ва сазовори медали тиллои ин мусобиқа гардад.
Ҳамчунин, Темур Раҳимов бо қаҳрамонӣ дар «Baku Grand Slam 2022» соҳиби 1000 имтиёзи Олимпӣ гардид ва мавқеи худро дар садри ҷадвали беҳтарин дзюдочиёни сайёра нигоҳ дошт.
Маврид ба зикр аст, ки варзишгари тоҷик Муллораҷаб Халифаев дар рӯзи якуми мусобиқаи «Baku Grand Slam 2022» оид ба дзюдо дар вазни то 66 кг барандаи медали нуқра гардид.
Ёдовар мешавем, ки дар ин рӯзи охири рақобатҳо варзишгарони дигари тоҷик дар вазни то 90 кг Комроншоҳи Устопириён ва Ҷаҳонгир Маҷидов дар даври 2-юм ва Раҳматулло Мирзоев бо Эмомризо Анварзода дар вазни то 100 кг дар даври аввал ноком шуда, аз идомаи мусобиқа бенасиб монданд.
Тоҷикистонро дар ин мусобиқа 12 варзишгар намояндагӣ карданд.
Мунтахаби дзюдои Тоҷикистон аз рӯи натиҷаи ин мусобиқа дар байни 61 давлат бо ду медал – 1 тилло ва 1 нуқра дар ҳисоби даставӣ дар ҷои 6 қарор гирфт.
Дар мусобиқоти «Baku Grand Slam 2022» ҳамагӣ варзишгарони 20 давлат тавонистанд соҳиби медал гарданд:
1. Озарбойҷон: 4 тилло ва 2 биринҷӣ
2. Нидерланд: 1 тилло, 2 нуқра ва 1 биринҷӣ
3. Сербия: 1 тилло, 2 нуқра ва 1 биринҷӣ
4. Италия: 1 тилло, 1 нуқра ва 3 биринҷӣ
5. Узбакистон: 1 тилло, 1 нуқра ва 2 биринҷӣ
6. Тоҷикистон: 1 тилло ва 1 нуқра
7. Канада: 1 тилло ва 1 нуқра
8. Молдова: 1 тилло
9. Фаронса: 1 тилло
10. Исроил: 1 тилло
11. Шветсия: 1 тилло
12. Белгия: 2 нуқра ва 1 биринҷӣ
13. Португалия: 2 нуқра
14. Муғулистон: 1 нуқра ва 1 биринҷӣ
15. Украина: 1 нуқра
16. Венгрия: 2 биринҷӣ
17. Гурҷистон: 2 биринҷӣ
18. Косово: 2 биринҷӣ
19. Словения: 2 биринҷӣ
20. Испания: 1 биринҷӣ