Дар Тоҷикистон Рӯзҳои фарҳанги Ҷумҳурии Исломии Эрон оғоз шуданд. Тавре қаблан иттилоъ додем, маросими ифтитоҳ дирӯз дар Театри давлатии академии опера ва балети ба номи С. Айнӣ бо иштироки Вазири фарҳанги Ҷумҳурии Тоҷикистон Зулфия Давлатзода ва Вазири фарҳанг ва иршоди исломии ҶИЭ Муҳаммадмеҳдӣ Исмоилӣ баргузор гардид.
Рӯзҳои фарҳанги Эрон дар шаҳрҳои Душанбе, Хуҷанд, Бохтар ва Кӯлоб бо ҳузури 60 нафар намояндагони мақомоти расмӣ, фарҳангӣ ва ҳунарии ин кишвар сурат мегиранд
Имрӯз, 1 ноябр, соати 14:00 маҳсули ҳунарҳои мардумии эрониён дар Осорхонаи миллии Тоҷикистон ба намоиш гузошта мешавад ва соати 17:00 дар толори Иттифоқи нависандагони Тоҷикистон нависандагону шоирони Тоҷикистону Эрон дар маҳфили адабӣ ҷамъ меоянд.
Рӯзи 2-юми ноябр баргузории маҳфили «Шоҳномахонӣ» дар Донишгоҳи миллии Тоҷикистон ва Донишгоҳи омӯзгории Тоҷикистон пешбинӣ шудааст. Ҳамзамон намоиши филмҳои «Писарони дарё», «Тахтӣ» ва «Роҳи обии абрешим» дар Кохи Наврӯз ва Кинотеатри «Ватан»-и Душанбе ба нақша гирифта шудааст.
Рӯзҳои 3 ва 4-уми ноябр ҳайати меҳмонон дар шаҳрҳои Хуҷанд, Бохтар ва Кулоб Рӯзҳои фарҳангро идома медиҳанд.
Дар Рӯзҳои фарҳанги Эрон дар Тоҷикистон қарор аст, бархе аз зарфиятҳо, тавлидот, дастовардҳо ва тавонмандиҳову халлоқиятҳои ҳунармандони Эрон дар арсаҳои ҳунар ва мусиқӣ ба намоиш гузошта шаванд”, — гуфтанд дар Вазорати фарҳанги Тоҷикистон.
Ба гуфтаи манобеъ, рӯзҳои фарҳангии Эрон дар Тоҷикистон як ҳафта идома карда, рӯзи 6-уми ноябр ба итмом мерасанд.
Дар ибтидои моҳи октябр Рӯзҳои фарҳанги Тоҷикистон дар Эрон доир гардида буданд.
Ёдовар мешавем, ки қаблан дар ҳошияи нишасти сарони кишварҳои узви Созмони ҳамкории Шанхай дар Самарқанд Президенти Тоҷикистон Эмомалӣ Раҳмон бо Президенти Эрон Саид Иброҳим Раисӣ масоили ҳамкориҳои бисёрҷонибаро баррасӣ карда буданд.
Президенти Тоҷикистон Эмомалӣ Раҳмон бо ишора ба арзишҳои муштараки таърихию фарҳангии ду халқ, дар ояндаи наздик баргузории Рӯзҳои фарҳанги кишварҳоро дар қаламравҳои ҳамдигар нақши муҳим дар таҳкими робитаҳои фарҳангӣ арзёбӣ карданд.
Сарони ду малакат ҳамчунин масъалаҳои рушди ҳамкориҳоро дар бахши хусусӣ ва давлатӣ, ҷалби сармоя, таъсиси корхонаҳои муштараки саноатӣ ва роҳандозии робитаҳои мустақим байни минтақаҳои озоди иқтисодӣ бо шаҳрҳои саноатии ду кишварро баррасӣ карданд.