Ҳайати Тоҷикистон таҳти роҳбарии Вазири саноат ва технологияҳои нави Ҷумҳурии Тоҷикистон Шералӣ Кабир аз корхонаи мошинсозии Минск /МАЗ/ ва корхонаи БелАЗ-и Беларус боздид намуд.
Директори генералии БелАЗ Сергей Никифорович меҳмонони тоҷикро бо фаъолияти корхона, сохтор ва иқтидори истеҳсолии он шинос намуд.
Шералӣ Кабир мошини худпартои барқии БелАЗ-7558Е-ро санҷида, ба он баҳои баланд дод. Ӯ ҳамзамон сатҳи пешрафтаи технологияҳои муосири дар корхона истифодашаванда, осон ва равон будани идоракунии чунин таҷҳизоти бузургро таъкид намуд.
Ёдовар мешавем, ки ҳафтаи гузашта дар Душанбе бо ширкати БелАЗ намоишгоҳи корхонаҳои Беларус баргузор шуд. Парки техникаи истеҳсоли ин корхона дар Беларус мошинҳои худпартои зинаи хурд бо иқтидори борбардории 30-45 тонна, таҷҳизоти махсус барои истихроҷи ангишт, тилло ва алюминийро муаррифӣ мекунад.
Бо назардошти афзоиши ҳаҷми истихроҷи маъдан, инчунин тарҳҳои сохтмони неругоҳҳои барқи обӣ барои ба Тоҷикистон фиристодани мошинҳои боркаши «БелАЗ» дурнамои хубу мусоид ба вуҷуд меояд.
Интизор меравад, ки аз рӯи натиҷаҳои сафари хайати Тоҷикистон ба Беларус харитаи роҳ барои рушди ҳамкорӣ таҳия шавад.
Манбаъ: Вазорати саноат ва технологиҳои нави Ҷумҳурии Тоҷикистон /АМИТ «Ховар»