25 октябр муовини Вазири корҳои хориҷии Тоҷикистон Содиқ Имомӣ нусхаи эътимодномаҳои Сафири Фавқулода ва Мухтори Федератсияи Россия дар Ҷумҳурии Тоҷикистон Семен Григоревро қабул кард.
Зимни вохӯрӣ ҷонибҳо масъалаҳои мубрами ҳамкории Тоҷикистон ва Россияро муҳокима намуданд.
С. Имомӣ С. Григоревро ба муносибати таъйин гардидан ба мансаби сафири кишвари дӯст табрик намуда, ба ӯ дар фаъолияти дипломатиаш ҷиҳати рушди бемайлони муносибатҳои дуҷониба муваффақият орзу намуд.
Тавре АМИТ «Ховар» қаблан хабар дода буд, Президенти Россия Владимир Путин 16 август бо як Фармон Семён Григоревро Сафири Фавқулода ва Мухтори Федератсияи Россия дар Тоҷикистон таъйин кард. Ӯ дар ин маснад Игор Лякин-Фроловро, ки Сафири Россия дар Тоҷикистон буд, иваз кард.