Таъмини ҳифзи амнияти озуқаворӣ вазифаи аввалиндараҷаи давлат маҳсуб мешавад. Дар ин бора Президенти Тоҷикистон муҳтарам Эмомалӣ Раҳмон дар паёми шодбошии худ ба муносибати ҷашни Меҳргон иброз доштанд.
«Ҳифзи амнияти озуқавории кишвар, яъне истифодаи самараноки обу замин, технологияҳои инноватсионӣ, баланд бардоштани ҳосилнокии зироат, <…> вазифаи муҳимтарину аввалиндараҷаи мо дар вазъияти кунунӣ мебошад»,-иброз намуданд Роҳбари давлат.
Ба гуфтаи Пешвои миллат, зарур аст «мардум [Тоҷикистон] дар фасли зимистон ба камчинӣ ва камбуди ғизо рӯ ба рӯ нашаванд».
Сарвари давлат ба роҳбарону мутахассисони вилоятҳо, шаҳру ноҳияҳо, хоҷагиҳои деҳқонӣ муроҷиат намуда, гуфтанд, ки ба масъалаи истифодаи самараноку оқилонаи ҳар ваҷаб замин, гирифтани се – чор ҳосил ва захираи маҳсулоти озуқаворӣ дар шароити буҳрони ҷаҳонӣ бисёр муносибати ҷиддӣ намоянд.