Дирӯз, 23 сентябр Вазири корҳои хориҷии Ҷумҳурии Тоҷикистон Сироҷиддин Муҳриддин дар ҳошияи «Ҳафтаи сатҳи баланд»-и иҷлоси 77-уми Маҷмаи Умумии СММ дар шаҳри Ню-Йорк бо муовини тозатаъйини Дабири кулли СММ оид ба масъалаҳои иқтисодӣ ва иҷтимоӣ (UN DESA) Ли Ҷунхуа мулоқот намуд. Дар ин бора АМИТ «Ховар» бо истиснод ба Вазорати корҳои хориҷии Ҷумҳурии Тоҷикистон хабар медиҳад.
Зимни мулоқот атрофи масъалаҳои мубрами ҳамкорӣ миёни Тоҷикистон ва UN DESA, аз ҷумла иқдомҳои муштарак дар самти пешбурди се рукни рушди устувор – иҷтимоӣ, иқтисодӣ ва экологӣ мубодилаи афкор сурат гирифт.
Ҷонибҳо ҳамчунин атрофи ташаббусҳои ҷаҳонии Тоҷикистон дар пешбурди Рӯзномаи ҷаҳонии об, эълон кардани соли 2025 ҳамчун Соли ҳифзи пиряхҳо ва Конфронси дарпешбудаи Душанбе оид ба мубориза бо терроризм ибрози андеша карданд.
«Масоили амнияти минтақавӣ, аз ҷумла зарурати расонидани кумакҳои башардӯстона ба ҳамсоякишвар — Афғонистон низ дар меҳвари муҳокимаи ҷонибҳо қарор гирифт», — таъкид карданд дар Вазорати корҳои хориҷии Тоҷикистон.