Имрӯз, 17 август дар варзишгоҳи «20-солагии Истиқлолияти Тоҷикистон»-и шаҳри Хуҷанд бозии финалии минтақаи марказии Ҷоми КФО-2022 миёни дастаҳои футболи «Хуҷанд»-и Тоҷикистон ва «Суғдиён»-и Узбекистон баргузор мешавад. Вохӯрӣ соати 15:30 оғоз мегардад, хабар медиҳад АМИТ «Ховар».
Дар сурати мусовӣ анҷом ёфтани вақти асосии рақобат миёни дастаҳои футболи «Хуҷанд»-и Тоҷикистон ва «Суғдиён»-и Узбекистон ду қисми иловагӣ иборат аз 15-дақиқагӣ таъйин карда мешавад. Агар ғолиб дар ин муддат ҳам муайян нашавад, бар асоси муқаррароти ФИФА силсилазарбаҳои 11-метра барандаи бозиро маълум менамоянд.
Тамоми мухлисон ва ҳаводорони футболи тоҷик ба варзишгоҳи «20-солагии Истиқлолияти Тоҷикистон» даъват мешаванд, то дастаи футболи «Хуҷанд»-и Тоҷикистонро дар ин бозии муҳим дастгирӣ кунанд.