Агентии обуҳавошиносии Кумитаи ҳифзи муҳити зисти назди Ҳукумати Ҷумҳурии Тоҷикистон ба таваҷҷуҳи сокинон ва меҳмонони мамлакат мерасонад, ки ҳарорати баланди ҳаво ва мавҷҳои гарми он дар ҷумҳурӣ то 28 июл ҳукмфармо мебошанд.
Тибқи пешгӯии ҳавошиносон, то охири моҳи июл ҳаво дар баъзе водиҳо то +40+45 дараҷа ва дар навоҳии ҷануби кишвар то +47 дараҷа гарм боқӣ мемонад.
Дар доманакӯҳҳо ва ноҳияҳои кӯҳӣ ҳаво гарм шуда, то 37+40 дараҷа ва дар вилояти ВМКБ то 42+44 дараҷа гарм мешавад.
Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон иттилоъ медиҳад, ки бар асари гарм шудани ҳаво дар ҳавзаҳои дарёҳои Панҷ, Вахш ва Зарафшон сатҳи об боло меравад. Инчунин дар ин рӯзҳо дар ноҳияҳои кӯҳӣ ва баландкӯҳи ҷумҳурӣ, ба истиснои қисмати шарқии Вилояти Мухтори Кӯҳистони Бадахшон хатари омадани селҳои пиряхӣ вуҷуд дорад.
Дар робита ба ин, 23 июл Кумитаи ҳолатҳои фавқулода ва мудофиаи граждании Ҷумҳурии Тоҷикистон бо тавсияи қатъӣ ба ширкатҳои сайёҳӣ муроҷиат кардааст, ки барои пешгирӣ аз садамаҳо якҷоя бо мутахассисони Кумита нақшаи масири сайёҳон ба кӯҳистонро таҳия кунанд. Ҳамчунин Кумита аз аҳолӣ даъват мекунад, ки то ҳадди имкон ҳангоми чаронидани чорво, ҳангоми моҳидорӣ ва ҷамъоварии гиёҳҳои шифобахш хеле эҳтиёткор бошанд.