Дар шаҳри Женеваи Конфедератсияи Швейтсария дар ҳошияи Конфронси 12-уми вазирони Созмони умумиҷаҳонии савдо (СУС) мулоқоти муовини Вазири рушди иқтисод ва савдои Ҷумҳурии Тоҷикистон Абдураҳмон Абдураҳмонзода ва муовини Вазири сармоягузорӣ ва савдои хориҷии Ҷумҳурии Узбекистон Бадриддин Абидов баргузор гардид.
Дар рафти мулоқот масъалаи шомилшавии Узбекистон ба СУС баррасӣ гардида, таҷрибаи Тоҷикистон дар раванди шомилшавӣ ба Созмон пешниҳод карда шуд. Аз ҷумла, ҷониби Тоҷикистон масъалаи мазкурро бо назардошти манфиатҳои иқтисоди миллӣ баррасӣ намуда, дар робита ба он пешниҳод манзур намуд, ки аз ҷониби узбекистонӣ пазируфта шуд.
Дар мулоқот А. Абдураҳмонзода зикр намуд, ки ҳамкории дуҷонибаи тиҷоратию иқтисодӣ байни Тоҷикистону Узбекистон дар асоси дастуру супоришҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ҳоли рушд қарор дорад. Аз ҷумла, гардиши савдои хориҷӣ байни ду кишвар марҳила ба марҳила тавсеа ёфта, дар соли 2021 ба 447,8 миллион доллар баробар гардидааст, ки ин нишондиҳанда нисбат ба солҳои қаблӣ ба маротиб рушд намудааст.
Дар охири вохӯрӣ ҷонибҳо омодагии худро ҷиҳати боз ҳам тақвият додани робитаҳои тиҷоратию иқтисодӣ иброз намуданд.
АКС: Вазорати рушди иқтисод ва савдои ҶТ