Донишҷӯи Коллеҷи санъати ба номи Содирхон Ҳофизи шаҳри Хуҷанд Севара Шарипова дар Озмуни байналмилалии эҷодиёти бачагонаи «Бозторгай»-и шаҳри Алмаатои Ҷумҳурии Қазоқистон сазовори ҷои аввал гардид, хабар медиҳад МД «Ҷаҳоннамо» бо истинод ба маркази матбуоти Вазорати фарҳанги Тоҷикистон.
Дар шаҳри Алмаатои Ҷумҳурии Қазоқистон озмуни байналмилалии эҷодиёти бачагонаи «Бозторгай» бо иштироки 700 нафар наврасони лаёқатманд аз 6 кишвари ҷаҳон баргузор шуд, ки дар он донишҷӯи Коллеҷи санъати ба номи С. Ҳофиз дар шаҳри Хуҷанд Севара Шарипова аз Ҷумҳурии Тоҷикистон иштирок намуда, аз рӯи номинаи «Иҷроиши мардумӣ» дар дутор сазовори ҷои аввал гардид.
Дар озмуни мазкур иштирокчиёни аз рӯи номинаҳои «вокал», «хореография» ва «иҷроиши мардумӣ» ширкат варзиданд. Миёни онҳо Севара Шарипова маҳорати баланди эҷодӣ нишон дода, сазовори баҳои баланди ҳайати ҳакамон гардид.
АКС: Вазорати фарҳанги ҶТ