Ширкати ҳавопаймоии «Сомон Эйр» парвозҳоро дар масири Душанбе-Москва-Душанбе афзоиш дод. Дар ин бора ба МД «Ҷаҳоннамо» дар хадамоти матбуоти ширкати ҳавопаймоии «Сомон Эйр» иттилоъ доданд.
Минбаъд парвозҳои мунтазам ба самти Москва (Фурудгоҳи Домодедово) ва бозгашт дар як рӯз ду маротиба тавассути ҳавопаймоҳои Boeing 737-800 анҷом дода мешаванд. Маълумоти бештар ва чиптаҳои парвоз дар сомонаи ширкат, хазинаҳои чиптафурӯшӣ ва маркази маълумотдиҳиву чиптафурӯшии ширкат дастрас мебошанд.
Ёдовар мешавем, ки ҳамаи мусофирон, ба истиснои шаҳрвандони Федератсияи Русия, бояд шаҳодатномаи гузаштани ПСР-тестро бо натиҷаи манфии санҷиши COVID-19, ки давоми 48 соат пеш аз ворид шудан ба қаламрави Федератсияи Русия дода шудааст, пешниҳод намоянд. Инчунин аз 15 марти соли равон вуруди мусофирон аз кишварҳои Иттиҳоди Давлатҳои Мустақил ба қаламрави Ҷумҳурии Тоҷикистон бо пешниҳоди гувоҳномаи ваксинатсия пурра ё қисман иҷозат дода шудааст.
Дар ҳолати надоштани гувоҳномаи ваксинатсия мусофирон бояд шаҳодатномаи гузаштани ПСР-тестро бо натиҷаи манфии санҷиши COVID-19, ки ба муҳлати 72 соат эътибор дорад, пешниҳод намоянд. Кӯдакони то 3-сола аз пешниҳоди ПСР-тест озод мебошанд.
АКС аз манбаъҳои боз