Беш аз даҳ санади нави ҳамкорӣ байни соҳибкорони минтақаҳои вилояти Суғд имрӯз дар доираи баргузории Форуми минтақавии соҳибкорони ватанӣ, ки имрӯз таҳти унвони «Рушди соҳибкорӣ дар соҳаи саноат» дар шаҳри Истаравшан дар доираи эълон гардидани «Солҳои рушди саноат» доир гардид, ба имзо расонида шуд. Дар ин бора ба МД «Ҷаҳоннамо» дар Кумитаи давлатии сармоягузорӣ ва идораи амволи давлатӣ иттилоъ доданд.
Дар форум беш аз 150 нафар намояндагони ширкату корхонаҳои саноатии ҷумҳурӣ, бонкҳо, вазорату идораҳо ва шарикони рушд иштирок намуда, масъалаҳои муҳими марбут ба рушди соҳибкорӣ дар соҳаи саноатро матраҳ карданд.
Форум бо ташаббуси Кумитаи давлатии сармоягузорӣ ва идораи амволи давлатӣ дар ҳамкорӣ бо мақомоти иҷроияи ҳокимияти давлатии вилояти Суғд, вазорату идораҳо ва шарикони рушд баргузор гардид.
Дар маросими ифтитоҳи форум раиси Кумитаи давлатии сармоягузорӣ ва идораи амволи давлатӣ Саъдӣ Қодирзода, муовини раиси вилояти Суғд Анвар Яқубӣ, Раиси шаҳри Истаравшан Адҳам Маъмурзода, намояндаи доимии Барномаи рушди СММ дар Тоҷикистон Леннӣ Монтиел ва директори Иттифоқи рушди бахши хусусӣ Наима Нурматова суханронӣ намуда, баргузории Форуми минтақвиро дар шаҳри Истаравшан қадами муассир дар самти татбиқи ҳадафи чоруми стратегии Ҳукумати Ҷумҳурии Тоҷикистон – саноатикунонии мамлакат арзёбӣ карданд.
Ҳадафи баргузории форум вусъати ҳамкорӣ байни соҳибкорони минтақаҳои гуногуни мамлакат, рушди фаъолияти корхонаҳои саноатӣ, ҷустуҷӯи имконияти рушди соҳибкории муосир ва стартапҳо, муаррифии имкониятҳои шарикии давлат ва бахши хусусӣ, ҷалби бештари сармояи бахши хусусии ватанӣ барои татбиқи лоиҳаҳои инфрасохторӣ, пешниҳоди роҳҳо ва усулҳои такмили сиёсати давлатӣ дар самти сармоягузориву соҳибкорӣ ба шумор меравад.
Инчунин роҳбарону намояндагони ширкату корхонаҳои саноатии кишвар назири «Оби зулол», «Мармарӣ» тавассути рӯнамо баромад намуданд.
Ҳамзамон иштирокдорони форум аз намоиши молу маҳсулоти корхонаҳои саноатӣ ва ҳунарҳои мардумии вилояти Суғд дидан карданд.
АКСҲО: Кумитаи давлатии сармоягузорӣ ва идораи амволи давлатии ҶТ