31 март дар шаҳри Исломобод таҳти раёсати Ҷумҳурии Исломии Покистон вохӯрии 5-уми роҳбарони ниҳодҳои олии аудити кишварҳои Созмони ҳамкории Шанхай (СҲШ) тариқи маҷозӣ баргузор шуд, хабар доданд ба МД «Ҷаҳоннамо» дар Палатаи ҳисоби Ҷумҳурии Тоҷикистон.
Дар вохӯрӣ роҳбарони ниҳодҳои олии аудити кишварҳои СҲШ – Тоҷикистон, Қазоқистон, Чин, Қирғизистон, Русия, Узбекистон, Ҳиндустон ва Покистон иштирок намуда, вобаста ба якчанд масъалаҳо, аз қабили «Аудити хароҷот барои мубориза бо Ковид-19», «Таъсири «Ковид-19» ба ноил шудан ба Ҳадафҳои Рушди Устувор» ва «Аудити фосилавӣ» мубодилаи афкор намуданд.
Раиси Палатаи ҳисоби Ҷумҳурии Тоҷикистон Қарахон Чиллазода дар мавзӯи «Таъсири Ковид-19 ба ноил шудан ба Ҳадафҳои Рушди Устувор» сухан гуфта, ба ҳамкории гуногунҷанбаи минбаъда изҳори умедворӣ намуд.
Дар ҷаласа иштирокдорон ба имзои протоколи ҷаласа ва Нақшаи чорабиниҳо дар чаҳорчӯби ҳамкории мақомоти олии аудити кишварҳои узви СҲШ барои солҳои 2022-2023 овоз доданд.
Тибқи қарори навбатӣ, ҷаласаи 6-уми СҲШ соли 2023 дар шаҳри Деҳлии Ҷумҳурии Ҳиндустон баргузор хоҳад гашт.
Мавриди зикр аст, ки вохӯрӣ дар ду сол як маротиба гузаронда шуда, бо мувофиқаи тарафҳо вазифаҳои ҳамоҳангсоз ба ҷониби қабулкунанда вогузор карда мешаванд.
Механизми мулоқоти роҳбарони ниҳодҳои олии назоратии кишварҳои узви СҲШ соли 2010 таъсис шуда буд, ки бо ташаббуси муштараки ниҳодҳои олии аудити Чин ва Русия сурат гирифтааст. Ҳоло ба ассотсиатсия ниҳодҳои олии аудити ҳашт кишвар — Ҷумҳурии Тоҷикистон, Ҷумҳурии Ҳиндустон, Ҷумҳурии Қазоқистон, Ҷумҳурии Мардумии Чин, Ҷумҳурии Қирғизистон, Ҷумҳурии Исломии Покистон, Федератсияи Русия ва Ҷумҳурии Узбекистон шомиланд.
АКСҲО: Палатаи ҳисоби ҶТ