Бино ба гуфтаи Раиси Бонки миллии Тоҷикистон Ҳоким Холикзода, дар Кодекси нави андоз барои низоми бонкӣ коҳиш додани гарониҳои андозӣ пешбинӣ гардида, ҳамзамон масъалаҳои баҳснок, мушкилоти духӯрагӣ ва дигар ҷанбаҳои андозбандӣ ба танзим дароварда шудаанд.
Тавре Ҳоким Холиқзода меафзояд, Кодекси андоз дар таҳрири нав бо мақсади ба равандҳои рушди иқтисодиёти ҷаҳонӣ дар самти рақамикунонии иқтисодиёт мутобиқ намудани андозбандии кишвар таҳия гардидааст.
Зимни вохӯрӣ бо намояндагони ташкилоти молиявию қарзӣ вай ҳамчунин содагардонии тарифҳо, аз байн бурдани омили инсонӣ ва коҳиши дахолат ба фаъолияти субъектҳои хоҷагидорро тавассути маъмурикунонии андоз асоснок кардааст.
Зикр шуд, ки дар таҳияи кодекс шахсони масъули Бонки миллӣ иштирок намуда, тағйироти мавриди амал қароргирифта барои рушди бахши бонкӣ ва дар маҷмӯъ иқтисоди Тоҷикистон имконияти нав фароҳам меорад. Дар охир раиси БМТ зикр намуд, ки ҷорӣ намудани Кодекси нави андоз ба ҷалби сармоя, тавсеаи пардохтҳои ғайринақдӣ ва дастрасии маблағҳо таъсири мусбат мерасонад.
Вай ба ташкилоти қарзӣ дастур дод, ки фаъолияти мӯътадилро таъмин намуда, эътимоди мардумро ба низоми бонкӣ афзоиш диҳанд.
Ёдовар мешавем, ки аз 1 январи соли ҷорӣ Кодекси нави андоз эътибор пайдо кард. Як қисми тағйирот давоми соли 2022 ва пас аз он фаъол карда мешаванд. Аз ҷумла, дар Кодекси андоз меъёри даромади андозбандишаванда барои муассисаҳои молиявӣ аз 23% ба 20% поён оварда шудааст.