Вазири рушди иқтисод ва савдои Ҷумҳурии Тоҷикистон Завқӣ Завқизода бо Ҳамоҳангсози доимии Созмони Милали Муттаҳид дар Ҷумҳурии Тоҷикистон хонум Сезин Синаноғлу корҳои омодагӣ ба баргузории ҷаласаи Шӯрои миллии рушди назди Президенти Ҷумҳурии Тоҷикистон ва Форуми рушди Тоҷикистонро баррасӣ намуданд, хабар доданд дар Вазорати рушди иқтисод ва савдои Ҷумҳурии Тоҷикистон.
Зимни вохӯрӣ З. Завқизода ба хонум Сезин Синаноғлу барои ҳамкории мутақобилан судманд ва ҳиссагузорӣ дар рушди устувори иқтисодии кишвар миннатдорӣ баён намуд.
Дар ҷараёни мулоқот масъалаҳои омодагӣ барои пешниҳоди Ҳисоботи ихтиёрии (VNR) дар СММ дар доираи Ҳадафҳои рушди устувор, ки соли 2023 ба нақша гирифта шудааст, мавриди муҳокима қарор гирифт.
Сезин Синаноғлу омодагии Созмони Милали Муттаҳид ва оҷонсиҳои онро барои мусоидат дар амалӣ гардонидани ҳадафу афзалияти рушди кишвар ва баргузории чорабиниҳои зикршуда баён намуд.
АКС: Вазорати рушди иқтисод ва савдои ҶТ