Соли 2021 дар натиҷаи 1080 тафтишу санҷиши молиявии аз ҷониби кормандони Агентии назорати давлатии молиявӣ ва мубориза бо коррупсияи Ҷумҳурии Тоҷикистон гузаронидашуда ба маблағи умумии 353 миллион сомонӣ зарари молиявӣ ошкор гардид. Дар ин бора имрӯз зимни нишасти матбуотӣ Директори Агентии назорати давлатии молиявӣ ва мубориза бо коррупсияи Ҷумҳурии Тоҷикистон Сулаймон Султонзода маълумот дод.
Ба таъкиди мавсуф, тавассути тадбирҳои андешида аз ин маблағ 324 миллион сомонӣ ё 92 фоиз барқарор карда шуд.
«Аз маблағҳои рӯёнидашуда 110 миллион сомонӣ ба буҷети давлатӣ ва 214 миллион ба ташкилоту муассисаҳо рост меоянд», — зикр намуд С. Султонзода.
Тазаккур дода шуд, ки тафтишу санҷишҳои молиявӣ дар вазорату идораҳо, мақомоти иҷроияи ҳокимияти давлатӣ, марказҳои татбиқи лоиҳаҳои сармоягузорӣ, субъектҳои хоҷагидории давлатӣ ва дигар муассисаҳои буҷетӣ гузаронида шуданд.