Гардиши мол миёни Тоҷикистон ва Туркманистон дар 11 моҳи соли гузашта 18,1 миллион долларро ташкил дод, ки нисбат ба ҳамин давраи соли 2020 2,7 баробар бештар аст. Ин рақам аз маълумоти Агентии омори назди Президенти Ҷумҳурии Тоҷикистон, ки зимни муҳокимаи Созишнома миёни ҳукуматҳои Тоҷикистон ва Туркманистон оид ба ҳамкорӣ дар соҳаи нақлиёти роҳи оҳан дар ҷаласаи навбатии Шӯрои Маҷлиси намояндагони Маҷлиси Олии Ҷумҳурии Тоҷикистон пешниҳод гардид, бармеояд.
Тавре котиби матбуоти Маҷлиси намояндагон Муҳаммадато Султонов ба АМИТ «Ховар» хабар дод, тасдиқи созишнома ба баланд шудани сатҳи хизматрасонии нақлиётии байналмилалӣ, содирот, воридот ва транзити молҳо тавассути роҳи оҳан миёни Тоҷикистон ва Туркманистон, таҳкими ҳамкории дуҷониба, афзоиши гардиши молу маҳсулот миёни ду кишвар, кушодани роҳҳои оҳан ба кишварҳои дигари аврупоӣ бо истифода аз роҳҳои оҳани транзитӣ ва бандари Туркманбошии Туркманистон тавассути баҳри Хазар, инчунин ноил шудан ба яке аз ҳадафҳои стратегии кишвари мо –баромадан аз бунбасти коммуникатсионӣ мусоидат мекунад.
Кумитаҳои Маҷлиси намояндагон дар хулосаҳои худ аз тасвиби ин созишнома ҷонибдорӣ карданд.
Ёдовар мешавем, ки Созишнома 4 августи соли 2021 (АКС) оид ба натиҷаҳои музокироти сатҳи баланд дар Ашқобод дар ҷараёни сафари давлатии Сарвари давлати Тоҷикистон ба Туркманистон ба имзо расид. Сарони давлатҳо Эмомалӣ Раҳмон ва Қурбонгулӣ Бердимуҳаммадов ба ҷонибдории андешидани тадбирҳо ҷиҳати татбиқи Барномаи байниҳукуматии ҳамкории тиҷоратию иқтисодӣ то соли 2023, таҳияи Харитаи роҳ барои рушди тиҷорат барои ду соли оянда, инчунин истифодаи васеи имконияти бандари байналмилалии баҳрии Туркманбошӣ ва маркази логистикии Тоҷикистон барои боркашонии транзитӣ ба манфиати ҳарду кишвар изҳори назар намуданд.
АКС: Хадамоти матбуоти Президенти ҶТ