Имрӯз Сарвазири Ҷумҳурии Тоҷикистон Қоҳир Расулзода бо Сафири Ҷумҳурии Беларус дар Ҷумҳурии Тоҷикистон Виктор Денисенко мулоқот намуд.
Мавриди зикр аст, ки гардиши мол миёни Тоҷикистону Беларус дар 9 моҳи соли 2021 наздики 30 миллион доллари америкоиро ташкил намуда, ҳамкории дуҷониба дар асоси сиёсати оқилонаи Сарони ҳарду давлат ҳамасола тақвият меёбад.
Таъкид гардид, ки Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон зимни ироаи Паём ба Маҷлиси Олии Ҷумҳурии Тоҷикистон солҳои 2022-2026-ро «Солҳои рушди саноат» эълон намуданд, ки ин дар баробари таъсиси минтақаҳои озоди иқтисодӣ, саноатикунонии босуръати кишвар ҳамчун ҳадафи чоруми миллӣ ва татбиқи дигар стратегияҳо ба рушди соҳаи саноат, бахши хусусӣ ва дастгирии соҳибкорону сармоягузорон замина мегузорад.
Зимни мулоқот ҷонибҳо дар баробари баррасии соҳаҳои муҳими ҳамкории дуҷониба ба соҳаи иқтисоду тиҷорат, кишоварзӣ, саноат, ҷалби сармоя ва таъсиси коргоҳу корхонаҳои истеҳсолии муштарак бештар мароқ зоҳир намуданд.