Тоҷикистон кишвари асосии содироткунандаи энергияи сабз дар Осиёи Марказӣ хоҳад шуд. Дар ин бора Вазири энергетика ва захираҳои оби Ҷумҳурии Тоҷикистон Далер Ҷумъа зимни мусоҳиба бо муовини сармуҳаррири рӯзномаи «Чумҳурият» Моҳира Сангмамадова изҳор доштааст.
Дар ин мусоҳиба Вазири энергетика ва захираҳои оби Ҷумҳурии Тоҷикистон доир ба ворид шудани Тоҷикистон ба низоми ягонаи энергетикии Осиёи Марказӣ, ҳамкориҳои минтақавӣ дар бахши энергетика ва вазъи дохилии соҳа ибрози андеша намудааст.
Ёдовар мешавем, ки Президенти Ҷумҳурии Тоҷикистон муҳтарам Эмомалӣ Раҳмон дар Паёми худ ба Маҷлиси Олии мамлакат ба Ҳукумати мамлакат дастур доданд, ки бо дарназардошти тағйирёбии глобалии иқлим ва зарурати рушди энергетикаи «сабз» бояд то охири соли 2022 Стратегияи рушди «иқтисоди сабз» дар Ҷумҳурии Тоҷикистонро қабул карда, татбиқи онро таъмин намояд.
Пешвои миллат зикр намуданд, ки бо амалисозии лоиҳаҳои бузурги бунёду таҷдиди иншооти энергетикии мамлакат мо итминон дорем, ки дар 7 соли оянда иқтидорҳои энергетикии кишварро ба 10 ҳазор мегаватт расонида, ба яке аз ҳадафҳои стратегии давлат, яъне истиқлолияти комили энергетикӣ муваффақ шавем.