Имрӯз, соати 13:00, бозии финалии Ҷоми Тоҷикистон-2021 миёни чемпиони ҳашткаратаи Тоҷикистон- дастаи «Истиқлол»-и шаҳри Душанбе бо барандаи медалҳои нуқраи чемпионати кишвар — дастаи футболи «Хуҷанд»-и шаҳри Хуҷанд дар варзишгоҳи «20-солагии Истиқлолияти Тоҷикистон» дар шаҳри Хуҷанд оғоз мешавад.
Дар бозии ҷавобии даври нимфинали Ҷоми Тоҷикистон-2021 дастаи футболи «Истиқлол»-и шаҳри Душнабе бар дастаи «Эсхата»-и шаҳри Хуҷанд бо ҳисоби 3:0 (натиҷаи ду бозӣ – 7:3) ғалаба кард. Голҳоро Манучеҳр Ҷалилов, Рустам Соиров ва Рёта Нома ба нишон расониданд. Дар бозии дигари нимфинал дастаи футболи «Равшан»-и шаҳри Кӯлоб дар майдони худ бар дастаи «Хуҷанд»-и шаҳри Хуҷанд бо ҳисоби 2:0 пирӯз шуд, вале иштирок дар Ҷоми Тоҷикистонро ба анҷом расонд. Дастаи футболи «Хуҷанд»-и шаҳри Хуҷанд бо шарофати пирӯзии калон (4:0) дар бозии аввал ба финал баромад. Қаблан дар финали Ҷоми Тоҷикистон дастаҳои футболи «Истиқлол»-и шаҳри Душанбе ва «Хуҷанд»-и шаҳри Хуҷанд ду маротиба бозӣ кардаанд. Соли 2010 дастаи «Истиқлол»-и шаҳри Душанбе бо ҳисоби 5:0 ва соли 2017 дастаи футболи «Хуҷанд»-и шаҳри Хуҷанд бо ҳисоби 2:0 пирӯз гардидаанд.
Хотиррасон мешавем, ки дастаи футболи «Истиқлол»-и шаҳри Душанбе дар таърихи мавҷудияташ 8 маротиба —солҳои 2009, 2010, 2013, 2014, 2015, 2016, 2018 ва 2019, дастаи футболи «Хуҷанд»-и шаҳри Хуҷанд чор маротиба – солҳои 1997/1998, 2002, 2008 ва 2017 ғолиби Ҷоми Тоҷикистон гаштаанд.
Боз ҳам хотиррасон мешавем, ки бозии финалии Ҷоми Тоҷикистон-2021 миёни дастаҳои футболи «Истиқлол»-и шаҳри Душанбе ва «Хуҷанд»-и шаҳри Хуҷанд имрӯз дар варзишгоҳи «20-солагии Истиқлолияти Тоҷикистон» дар шаҳри Хуҷанд оғоз мешавад. Даромад ба варзишгоҳ ройгон аст.
Ҷоми Тоҷикистон-2021
Финал
9 декабр (панҷшанбе)
Оғоз — соати 13:00
«Истиқлол» — «Хуҷанд»
Довари марказӣ: Беҳрӯз Муртазоев (Душанбе)
Ёварон: Ҳасан Каримов, Исмоил Нуралиев (ҳарду аз Норак).
Довари эҳтиётӣ: Ҳамза Шоймардонов (Хуросон).
Доварони иловагӣ: Насрулло Кабиров (Норак), Сайёдҷон Зайниддинов (Душанбе).
Нозири доварон: Насриддин Азизов (Қубодиён).
Комиссари бозӣ: Ҷамшед Исмоилов (Душанбе).
Хуҷанд, варзишгоҳи «20-солагии Истиқлолияти Тоҷикистон»