Ҷумҳурии Корея тасмим гирифтааст, ки дар татбиқи лоиҳаҳо дар соҳаи нақлиёти Тоҷикистон саҳм гузорад. Далели ин ба имзо расонидани Ёддошти тафоҳум миёни Вазорати нақлиёти Ҷумҳурии Тоҷикистон ва Ширкати «Living Tree Co. Ltd»-и Ҷумҳурии Корея мебошад, иттилоъ доданд аз Вазорати нақлиёти ҷумҳурӣ.
Санади мазкурро дар Душанбе Вазири нақлиёти Тоҷикистон Азим Иброҳим ва намояндаи Ширкати «Living Tree Co. Ltd»-и Ҷумҳурии Корея ба имзо расониданд. Дар доираи ба имзо расонидани Ёддошти тафоҳум Вазири нақлиёти Ҷумҳурии Тоҷикистон Азим Иброҳим бо намояндагони Ширкати «Living Tree Co. Ltd»-и Ҷумҳурии Корея мулоқот намуда, масъалаи ҳамкорӣ дар соҳаи нақлиётро баррасӣ намуд.
Ҷонибҳо ба мувофиқа расиданд, ки барои амалӣ намудани лоиҳаҳои гуногун дар соҳаи нақлиёт дар Ҷумҳурии Тоҷикистон, аз ҷумла, бунёди марказҳои байналмилалии логистикӣ, сохтмони роҳи оҳан, таъмини бехатарии ҳаракат дар роҳ дар Тоҷикистон ҳамкории густурда ба роҳ монда шавад.
АКС: Вазорати нақлиёти ҶТ