Имрӯз, 29 ноябр Вазири корҳои хориҷии Ҷумҳурии Тоҷикистон Сироҷиддин Муҳриддин муовини Дабири кулли СММ, мудири иҷроияи Дафтари СММ оид ба маводи мухаддир ва ҷинояткорӣ (UNODC) Ғода Волиро, ки бо сафари корӣ дар Душанбе қарор дорад, ба ҳузур пазируфт.
«Дар суҳбат ҷонибҳо масъалаҳои мубрами ҳамкории тарафайнро дар чаҳорчӯби барномаву лоиҳаҳои созмони мазкур дар самти пешгирӣ ва мубориза бо гардиши ғайриқонунии маводи мухаддиру ҷинояткорӣ мавриди муҳокима қарор доданд»,- хабар доданд дар ВКХ Тоҷикистон.
Сироҷиддин Муҳриддин бо изҳори қаноатмандӣ аз сатҳи ҳамкории мақомоти Ҷумҳурии Тоҷикистон бо UNODC дар мавриди мубориза бо таҳдиду хатарҳои амниятӣ, аз ҷумла терроризми байналмилалию ифротгароӣ, ҷиноятҳои муташаккилона ва киберӣ, муомилоти ғайриқонунии маводи мухаддир ва савдои одамон сухан гуфт.
«Нақши Созмони Милали Муттаҳид ва ниҳодҳои тахассусии он дар рафъи зуҳуроти номатлуби зикршуда, аз ҷумла ба воситаи расонидани кумаки фаннӣ муҳим аст»,- таъкид намуд Вазири корҳои хориҷии Тоҷикистон.
АКС: ВКХ ҶТ