Агентии назорати давлатии молиявӣ ва мубориза бо коррупсия ваколатдори шуъбачаи кофтукови ҷиноии ШВКД дар ноҳияи Шамсиддини Шоҳинро бо ҷурми қаллобӣ дастгир намуд.
«Комилов Умед Одинаевич дар вазифаи ваколатдори шуъбачаи кофтукови ҷиноии ШВКД дар ноҳияи Ш.Шоҳин кор карда истода, давоми фаъолияти корияш бо мақсади ғаразнок ва бо истифодаи мақоми хизматӣ аз шаҳрванд “А” барои гӯё нисбаташ оғоз накардани парвандаи ҷиноятӣ маблағи 10000 сомонӣ талаб намуда, гирифтааст», — хабар доданд аз Агентӣ.
Вобаста ба ҳолати мазкур нисбат ба Умед Комилов бо моддаи 247 қисми 3 банди «а» Кодекси ҷиноятии Ҷумҳурии Тоҷикистон парвандаи ҷиноятӣ оғоз карда шуда, баъди ба анҷом расидани тафтиши пешакӣ он бо тасдиқи фикри айборкунӣ барои баррасӣ ба суд ирсол гардид.
Агентии назорати давлатии молиявӣ ва мубориза бо коррупсияи Ҷумҳурии Тоҷикистон ба ҳамаи шаҳрвандони мамлакат чунин муроҷиат мекунад:
«Дар хотир дошта бошед, ки коррупсия ҳамчун ҷинояти вазнин яке аз унсурҳои таҳдидкунанда ба амнияти миллӣ ва халалдоркунандаи рушду суботи иҷтимоию иқтисодии давлат мегардад. Биёед бо ин зуҳуроти хавфноки ҷомеа якҷоя муқовимат намоем! Телефони боварии мо: (+992 37) 224 – 23-23».
АКС: Агентии назорати давлатии молиявӣ ва мубориза бо коррупсияи ҶТ