23 ноябр дар кинотеатри ба номи Тоҳир Собиров бахшида ба пойтахти фарҳангии Иттиҳоди Давлатҳои Мустақил эълон гардидани шаҳри Душанбе дар соли 2021 кинофестивали «Чашмаи зулол» бо иштироки Ҳунарманди шоистаи Федератсияи Русия Эвклид Кюрдзидис баргузор мегардад.
Кинофестивал ба ташаббуси Маркази илму фарҳанги Русия дар Тоҷикистон ва дар ҳамкорӣ бо Муассисаи давлатии «Тоҷикфилм» доир мегардад.
Дар доираи кинофестивал филми ҳунарии «Флэшмоб», ки дар он яке аз нақшҳои асосиро Эвклид Кюрдзидис иҷро намудааст, барои доираи васеи алоқамандони кино намоиш дода мешавад. Баъди тамошои филм миёни ҳунарпешаю тамошобинон мубоҳисаю музокирот дар назар дошта шудааст.
Баргузории кинофестивали мазкур ба рушду таҳкими ҳамкорӣ дар соҳаи фарҳангу кино ва тақвияти робитаҳои фарҳангӣ миёни Тоҷикистон ва Русия мусоидат менамояд.
АКС: Муассисаи давлатии «Тоҷикфилм»