Вазири корҳои хориҷии Ҷумҳурии Тоҷикистон Сироҷиддин Муҳриддин 11 май дар Сиан дар маросими ифтитоҳи 5-умин намоишгоҳи байналмилалии «Роҳи Абрешим», ки таҳти шиори «Пайвастагӣ, сохтмон ва истифодаи муштарак» мегузарад, сухан гуфт.
Бино ба иттилои Вазорати корҳои хориҷии Тоҷикистон, Сироҷиддин Муҳриддин зимни суханронӣ аҳамияти намоишгоҳи байналмилалии «Роҳи Абрешим» -ро ҳамчун барномаи нав барои рушди ҳамкорӣ миёни кишварҳои минтақа зикр намуд.
Аҳамияти баргузории чунин намоишгоҳҳо бо мақсади шиносоӣ бо мероси таърихию фарҳангии халқҳо ва муаррифии молҳои миллӣ, имконияти мавҷуда барои тавсеаи ҳамкорӣ дар соҳаҳои тиҷорат, сармоягузорӣ, энергетика, саноат ва кишоварзӣ, инчунин соҳаи нақлиёт ва коммуникатсия зикр карда шуд.
Сироҷиддин Муҳриддин пешниҳод кард, ки талошҳо барои истифодаи самараноки неруи бузурги минтақа дар бахшҳои гуногуни иқтисодиёти миллӣ идома дода шаванд.