Панҷумин Бозиҳои ҳамбастагии исломӣ, ки мебоист 10-19 сентябри соли равон дар шаҳри Қунияи Туркия баргузор мешуд, як сол ба таъхир афтод. Ба барномаи 5-умин Бозиҳои ҳамбастагии исломӣ 20 намуди варзиш: варзиши сабук; камонварӣ; бадминтон; баскетбол 3х3; бочче; велосипедронӣ; шамшербозӣ; футбол; гимнастика; ҳендбол; дзюдо; каратэ; кикбоксинг; шиноварӣ; тенниси рӯи миз; таэквондо (WTF); волейбол; вазнбардорӣ; гӯштини варзишӣ ва камонварии анъанавӣ ворид гардидаанд.Дар ин бора Кумитаи миллии олимпии Тоҷикистон иттилоъ медиҳад.
Шӯрои иҷроияи Федератсияи варзишҳои ҳамбастагии исломӣ таҳти раёсати шоҳзода Абдулазиз ибни Туркӣ Ал-Файсал бо Кумитаи тадорукоти 5-умин Бозиҳои ҳамбастагии исломӣ – Қуния-2021 бо роҳбарии вазири ҷавонон ва варзиши Туркия Меҳмет Муҳаррам Касапоғлу мулоқот намуд.
Дар вохӯрӣ ҳамаи масъалаҳо дар робита ба тадорукоти 5-умин Бозиҳои ҳамбастагии исломӣ ва вазъияти феълии тандурустии ҷаҳон дар пасманзари пандемияи коронавирус баррасӣ гардид. Гуфта шуд, ки вазъи тандурустии ҷаҳон мумкин аст барои иштироки бисёре аз кишварҳо, ки иммунизатсияи COVID-19 суст ҷараён дорад, монеа эҷод кунад.
Бо сабаби он ки Федератсияи варзишҳои ҳамбастагии исломӣ ва Кумитаи тадорукоти бозиҳо ҷонибдори иштироки ҳамаи кишварҳои аъзо дар бозиҳо ҳастанд, тасмим гирифта шуд, ки 5-умин Бозиҳои ҳамбастагии исломӣ соли 2022 аз 9 то 18 август баргузор карда шавад.
Дар аввал қарор буд, ки бозиҳо 20-29 августи соли 2021 доир мегарданд. Вале баъд аз он ки моҳи марти соли 2020 Бозиҳои олимпӣ дар Токио ба соли 2021 гузаронида шуданд, замони баргузории Бозиҳои ҳамбастагии исломӣ дар Қуния 10-19 сентябри соли 2021 муайян гардид.
Мамбаъ: АМИТ «Ховар»