Ҳимоятгари дастаи мунтахаби Тоҷикистон оид ба футбол ва «Истиқлол»-и Душанбе Табрези Давлатмир фаъолияти варзишии худро дар премиум-лигаи чемпионати Эстония идома медиҳад.
Футболбози 22-солаи тоҷик бо клуби Эстония «Нарва-Транс» шартнома бастааст. Дар клуби нави худ Табрези Давлатмир бо рақами 3 баромад мекунад.
«Рафтан ба клуби «Нарва-Транс» барои ман мушкилоти нави касбист. Мехоҳам ҳарчи зудтар бо ин даста шинос шавам ва дар клуби нав тамринро оғоз кунам. Бо истифода аз ин фурсат, ман мехоҳам ба клуби «Истиқлол», ки дар он чанд мавсим бозӣ кардаам, ташаккур гӯям. Ба клуби Душанбе дар марҳилаи гурӯҳии Лигаи қаҳрамонҳои АФК-2021 муваффақият орзу мекунам », — гуфт Табрези Давлатмир.
Мавсими нави лигаи олии Чемпионати Эстония, ки дар он даҳ клуб иштирок мекунанд, 5 март оғоз меёбад.