Муовини раиси Шӯрои вилоятии вилояти Ғури Ҷумҳурии Исломии Афғонистон Абдулраҳмон дар натиҷаи таркиши минаи магнитӣ 15 декабр ҳалок шуд, хабар медиҳад АМИТ «Ховар» бо истинод ба Afghanistan.ru.
Ҳамлаи террористӣ дар шаҳри Фирӯзкӯҳ, маркази маъмурии вилояти мазкур сурат гирифт. Ба асари таркиши мина як узви дигари Шӯрои вилоятӣ низ маҷрӯҳ шуд.
Ёдовар мешавем, ки дар тӯли 24 соати охир ин дуввумин таркиш дар кишвар аст, ки мансабдорони давлатӣ қурбони он мешаванд. Тавре АМИТ “Ховар” дирӯз хабар дода буд, субҳи рӯзи сешанбе муовини волии вилояти Кобул Маҳбубуллоҳ Муҳибӣ дар як ҳодисаи мушобеҳ дар пойтахти Афғонистон кушта шуд.
То ҳол ягон гурӯҳи мусаллаҳи оштинопазир масъулияти ҳамлаҳои мазкурро ба зима нагирифтааст.