6 декабр дар шаҳри Панҷакент бо ҷалби кормандони мақомоти иҷроияи ҳокимияти давлатии шаҳр, ташкилоту идораҳо ва сокинон ҳашари ниҳолшинонӣ баргузор гардид.
Тавре аз мақомоти иҷроияи ҳокимияти давлатии шаҳри Панҷакент ба АМИТ «Ховар» хабар доданд, дар маъракаи ниҳолшинонӣ зиёда аз 600 бех ниҳоли сӯзанбарг дар ҳудуди ҷамоатҳои деҳоти Саразму Чинор шинонида шуд.
Иқдоми мазкур дар доираи 1300 рӯзи меҳнати зарбдор ба истиқболи 30-солагии Истиқлоли давлатии Ҷумҳурии Тоҷикистон амалӣ гардида, ду канори роҳи асосии ҳудуди шаҳру деҳоти Панҷакент аз ноҳияи Айнӣ то сарҳади Ҷумҳурии Ӯзбекистон бо ниҳолҳои ҳамешасабз сабзу хуррам гардонида мешавад.
Ёдовар мешавем, ки имрӯзҳо дар асоси дастуру супоришҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар саросари вилоят маъракаи ниҳолшинонӣ ҷараён дорад.