 Фаронса то охири соли 2013-ум тамоми низомиёни худро аз қаламрави Афғонистон хориҷ мекунад. Қарори мазкур зимни мулоқоти навбатии президенти Афғонистон-Ҳомид Карзай ва президенти Фаронса Николя Саркози, ки дар қасри Елисей баргузор гардид, қабул карда шуд. Бояд гуфт, ки аз тирамоҳи соли гузашта, Фаронса ба ихроҷи нерӯҳои ҳарбии худ аз Афғонистон оғоз карда буд. То ин дам аллакай 400 нафар низомии фаронсавӣ хоки ин кишварро тарк гуфтанд. Айни ҳол 3 ҳазору 600 сарбози дигари ин мамлакат дар Афғонистон мустақаранд. Ба гуфти Николя Саркозӣ бояд акнун таъмини амнияти аҳолии 30 миллионнафараи Афғонистонро мақомоти қудратии ин кишвар ба ӯҳда гирад. Ташрифи Ҳомид Карзай дар ҳоле сурат мегирад, ки ҳафтае қабл бар асари як задухӯрди шадид 4 нафар низомии фаронсавӣ ба ҳалокат расида, 16 каси дигар захмӣ шуданд. Аз оғози амалиёти нерӯҳои ҳарбии Фаронса дар Афғонистон, ки ба соли 2001-ум рост меояд, то ин дам дар пайи ҳамлаву амалҳои террористӣ, 82 нафар хизматчии ҳарбии фаронсавӣ ҷони худро аз даст дода, садҳо каси дигар ҷароҳат бардоштанд. |
........................
