«Урбан групп» 500 нафар бинокорони тоҷикро ба кор даъват кард

Бо мусоидати Намояндагии Вазорати меҳнат, муҳоҷират

ва шуғли аҳолии Ҷумҳурии Тоҷикистон дар Федератсияи Русия оид ба муҳоҷират дар соли 2016 — 12 ҳазору 487 нафар муҳоҷирони меҳнатӣ бо ҷойи кор таъмин гардиданд. Ҳафтаи гузашта кормандони Намояндагӣ бо намояндагони калонтарин Ширкати сохтмонии Русия «Урбан групп», ки дар шаҳр ва вилояти Москва ба сохтмони манзилҳои истиқоматӣ машғул аст, мулоқот намуданд. Дар айни ҳол аз ҷониби ширкати мазкур ба унвони Намояндагӣ оид ба қабули 500 нафар сохтмончиён ба кор дархост ирсол гардидааст. Муҳоҷирони меҳнатӣ шурӯъ аз моҳи феврали соли 2017 ба кор сафарбар мегарданд. Ҳамчунин шикати мазкур мақсад дорад, ки давра ба давра дар соли 2017 шумораи сохтмончиёнро аз ҳисоби муҳоҷирони меҳнатии тоҷик зиёд намояд. Дар ин бора Иброҳим Аҳмадов, сардори Хадамоти матбуоти Намояндагии мазкур иттилоъ дод. Ӯ ҳамчунин зикр кард, ки дар соли сипаришуда кормандони Намояндагӣ бо мақсади омӯзиши бозори меҳнати Федератсияи Русия ва бо ҷойи кор таъмин намудани шаҳрвандони Тоҷикистон бо роҳбарони 158 субъекти ҳоҷагидор дар минтақаҳои гуногуни ин кишвар мулоқотҳои судманд анҷом доданд.